ಸತ್ಯವತಿಯು ಶಂತನುವನ್ನು ಮದುವೆಯಾಗುವುದಕ್ಕಿಂತ ಮುಂಚೆ ಕನ್ಯಾವಸ್ಥೆಯಲ್ಲಿದ್ದಾಗ ಪರಾಶರ ಮಹರ್ಷಿಗಳಿಂದ ವೇದವ್ಯಾಸರನ್ನು ಪುತ್ರನನ್ನಾಗಿ ಪಡೆದಿದ್ದಳು.

ಶಂತನು ಮತ್ತು ಸತ್ಯವತಿಯ ಮಕ್ಕಳಾದ ಚಿತ್ರಾಂಗದ ಮತ್ತು ವಿಚಿತ್ರವೀರ್ಯರಲ್ಲಿ, ಚಿತ್ರಾಂಗದನು ಯೌವನಾವಸ್ಥೆಗೆ ಬರುವ ಮೊದಲೇ ಗಂಧರ್ವನಿಂದ ಹತನಾದನು. ಆದುದರಿಂದ ವಿಚಿತ್ರವೀರ್ಯನು ರಾಜನಾದನು.

ವಿಚಿತ್ರವೀರ್ಯನು ಕಾಶೀರಾಜನ ಪುತ್ರಿಯರಾದ ಅಂಬಿಕೆ ಮತ್ತು ಅಂಬಾಲಿಕೆಯರನ್ನು ವಿವಾಹವಾದನು. ಆದರೆ ದುರದೃಷ್ಟವಶಾತ್ ಇಬ್ಬರು ಪತ್ನಿಯರಲ್ಲಿ ಮಕ್ಕಳನ್ನು ಪಡೆಯುವ ಮುನ್ನವೇ ವಿಚಿತ್ರವೀರ್ಯನು ಮರಣ ಹೊಂದಿದನು.

ಆಗ ಸತ್ಯವತಿಯು ಶಂತನುವಿನ ವಂಶವು ಇಲ್ಲದಂತಾಗಬಾರದೆಂದು ಚಿಂತಿಸಿ, ತನ್ನ ಮೊದಲ ಮಗನಾದ ವೇದವ್ಯಾಸರನ್ನು ನೆನೆದಳು. ವ್ಯಾಸರು ಪ್ರತ್ಯಕ್ಷರಾದಾಗ, ಸತ್ಯವತಿಯು ಪರಿಸ್ಥಿತಿಯನ್ನು ವಿವರಿಸಿ, ವಂಶದ ಉದ್ಧಾರಕ್ಕಾಗಿ ಅಂಬಿಕೆ ಮತ್ತು ಅಂಬಾಲಿಕೆಯರಿಗೆ ಸಂತಾನ ಕರುಣಿಸುವಂತೆ ಕೋರಿದಳು. 

ಅದರಂತೆ ವ್ಯಾಸ ಮಹರ್ಷಿಗಳಿಂದ ಧೃತರಾಷ್ಟ್ರ, ಪಾಂಡು ಮತ್ತು ವಿದುರ ಎಂಬ ಮೂವರು ಮಕ್ಕಳು ಜನಿಸಿದರು.

ಧೃತರಾಷ್ಟ್ರನು ಗಾಂಧಾರಿಯನ್ನು ವಿವಾಹವಾದನು. ಗಾಂಧಾರಿಗೆ ವರದ ಬಲದಿಂದ ನೂರು ಜನ ಪುತ್ರರು ಜನಿಸಿದರು. ಇವರಲ್ಲಿ ದುರ್ಯೋಧನ, ದುಶ್ಶಾಸನ, ವಿಕರ್ಣ ಮತ್ತು ಚಿತ್ರಸೇನ ಪ್ರಮುಖರಾಗಿದ್ದರು. 

ಇತ್ತ ಪಾಂಡು ಮಹಾರಾಜನಿಗೆ ಕುಂತಿ ಮತ್ತು ಮಾದ್ರಿ ಎಂಬ ಇಬ್ಬರು ಪತ್ನಿಯರಿದ್ದರು.

ಒಮ್ಮೆ ಪಾಂಡು ಮಹಾರಾಜನು ಕಾಡಿನಲ್ಲಿ ಬೇಟೆಯಾಡುತ್ತಿದ್ದಾಗ, ಮೈಥುನ ನಿರತನಾಗಿದ್ದ ಋಷಿಯೊಬ್ಬನಿಗೆ ತಿಳಿಯದೇ ಬಾಣ ಹೂಡಿದನು. ಆ ಋಷಿಯು ಮರಣಿಸುವ ಮುನ್ನ ಪಾಂಡುವಿಗೆ, “ನೀನು ನಿನ್ನ ಪತ್ನಿಯರ ಸಮೀಪಕ್ಕೆ ಹೋದರೆ ಮರಣ ಹೊಂದುತ್ತೀಯ” ಎಂದು ಶಾಪ ನೀಡಿದನು. ಇದರಿಂದ ದುಃಖಿತನಾದ ಪಾಂಡು ತನಗೆ ಸಂತಾನವಿಲ್ಲದ್ದಕ್ಕೆ ಕೊರಗತೊಡಗಿದನು. 

ಆಗ ಅವನು ಕುಂತಿಗೆ ಬೇರೆಯವರಿಂದ ಸಂತಾನ ಪಡೆಯಲು ಅನುಮತಿ ನೀಡಿದನು. ಕುಂತಿಯು ತನಗೆ ದೂರ್ವಾಸ ಮುನಿಗಳು ನೀಡಿದ್ದ ಮಂತ್ರದ ಶಕ್ತಿಯಿಂದ ಯಮನಿಂದ ಯುಧಿಷ್ಠಿರ (ಧರ್ಮರಾಯ), ವಾಯುದೇವನಿಂದ ಭೀಮಸೇನ ಮತ್ತು ದೇವೇಂದ್ರನಿಂದ ಅರ್ಜುನನನ್ನು ಪುತ್ರರನ್ನಾಗಿ ಪಡೆದಳು.

ಮಾದ್ರಿಗೂ ಆ ಮಂತ್ರವನ್ನು ಉಪದೇಶಿಸಿದಾಗ, ಅವಳು ಅಶ್ವಿನಿ ದೇವತೆಗಳಿಂದ ನಕುಲ ಮತ್ತು ಸಹದೇವ ಎಂಬ ಅವಳಿ ಮಕ್ಕಳನ್ನು ಪಡೆದಳು. 

ಹೀಗೆ ಪಂಚ ಪಾಂಡವರ ಜನನವಾಯಿತು. ಒಂದು ದಿನ ಪಾಂಡು ಮಹಾರಾಜನು ಕಾಮವಶನಾಗಿ ಮಾದ್ರಿಯ ಸಮೀಪಕ್ಕೆ ಹೋದಾಗ ಶಾಪದ ಪ್ರಭಾವದಿಂದ ಮರಣ ಹೊಂದಿದನು. ಮಾದ್ರಿಯು ಪತಿಯ ಚಿತೆಯನ್ನೇರಿ ಸಹಗಮನ ಮಾಡಿದಳು.